പന്ത്രണ്ടു മക്കളെ പെറ്റൊരമ്മ
കുന്ത്രാണ്ടങ്ങളൊന്നുമേ നേരേ വളര്ന്നതില്ല
ഒന്നാമന് അച്ഛന്റെ പാത പറ്റി
ഒന്നാം നമ്പര് കുടിയനായി
കണ്ട പെണ്കേസ്സിലൊക്കെ പെരുകേറ്റി
കണ്ടകശനിയില് പിറന്ന കോന്തന്
തണ്ടും തടിയും എമ്പാടുമുള്ള
രണ്ടാമന് അവനൊരു പിടിയനായി
മൂന്നാമന്റെ മുന്നില് പെട്ടുപോയാല്
മൂര്ഖന്നു പോലും രക്ഷയില്ല
മൂന്ന് നിമിഷം കൊണ്ട് മൂപ്പര്
മുച്ചൂടും വില്ക്കുന്ന മുടിയനായി
നാലാമന് നാട്ടില് പേരുകേട്ട
വില്ലനാം താനെന്നു പേരുമിട്ടു
കോലിന്റെ മുന്നിലെ ചെണ്ടപോലെ
തല്ലുകൊള്ളിയാം ഇടിയനായി
അഞ്ചാമന് കഞ്ചാവ് വലിച്ചു കേറ്റി
അലഞ്ഞു നടക്കും പൊടിയനായി
ആറാമന് കാറുകള് കട്ടെടുത്ത്
മറയത്ത് മുങ്ങുന്ന ഒടിയനായി
ഏഴാമന് പെണ്ണിന്റെ ഗുണഗണങ്ങള്
മുഴുവനായുള്ള മഹിളനായി
ഒഴിവിന്റെ വേളകള് കുളക്കടവില്
അഴുക്കലക്കുന്ന എടിയനായി
എട്ടാമന് പൊറോട്ട തിന്നു തിന്നു
മുട്ടയും പുട്ടും പഴവും പിന്നെ
മാട്ടിറച്ചിയും വലിച്ചു കേറ്റി കിടക്കും
കട്ടിലു പൊട്ടിക്കും തടിയനായി
ഒമ്പതാമത്തെ വമ്പനാണേല്
കൊമ്പൊന്നു മൂത്താല് ചന്ദനവും
മുമ്പിന്നു പോലും മുറിച്ചെടുക്കും
അമ്പോ ആളുകള്ക്കവന് കടിയനായി
പത്താമന് ഒത്തിരി കാലമായി
പാത്തും പതുങ്ങിയും കേറിവന്നു
അടുപ്പത്തിരിക്കും ചോറു തിന്നു
പണിയെടുക്കാത്ത മടിയനായി
പതിനൊന്നാമന് പാതിരാത്രി
പുതുമാരന്റെ വീട്ടില് ഫോണ് വിളിച്ചു
പേടിപ്പെടുത്തും കഥകള് ചൊല്ലി
കോളുമുടക്കും വടിയനായി
പന്ത്രണ്ടാം സന്തതി ചന്തയില് കൊണ്ടുപോയി
നൊന്തുപെറ്റുള്ള പെറ്റമ്മയെ ചവറ്റു-
കൊട്ടയില് ചാക്കിലിട്ടു, ചുറ്റിലും നോക്കി
മടങ്ങിയപ്പോള് ക്രൂരനായൊരു കൊടിയനായി
അഭിപ്രായങ്ങളൊന്നുമില്ല:
ഒരു അഭിപ്രായം പോസ്റ്റ് ചെയ്യൂ